Nu n’era biondu, nu purtava l’ali, ma era beddru, umile, altruista, amava la natura e l’animali cu la bontà sapia cu te conquista.

Nu lu vitivi propriu mai stizzatu, purtava sempre a  risu ddr’occhi beddri, e puru quannu l’hannu sciuticatu, nu saie mai zziccatu cu ciuveddri.

Sapia cu usa sempre ddò parole, tutte le fiate quannu lu truvavi: ci te cercava nenti: "PER FAVORE" e "CRAZIE" te ticia ci lu iutavi.

Era a semplicità l’arma vincente, era l’amicu, u sìnnicu, u tottore, e a tutta — ticu — a tutta quanta a gente, ne facia bene propriu cu lu core.

Montgomery su a spaddra e a borsa a manu, cusi scia trova tutti i malati, ca tinia sparsi a tuttu Casaranu    Ca mò mmenzu ‘na via s’hannu truvati.

Amava lu mestiere ca facia, nu n’era ‘nu lavoru...    ‘na passione e pe le ferie, in Kenia se ne scia percè ticia ca tene na missione

Ca era quiddra cu se pija cura ti povareddri e te li sfortunati, te tutti quiddri ca "madre natura" l’ha misi in terra e l’hai abbandonati.

Ieu su convintu ca nu ne nasce cchiui, N’addru William Ingrosso a Casaranu, percè sicuramente a menzu nui nun c’è ciuveddri ca ete cusì umanu.

Purtroppu u Patreternu o a face apposta o sta cu l’occhi chiusi ddri momenti, cusì la morte, brutta e facci tosta se porta i boni e lassa i telinguenti.

Prima ci te l’ufficiu sou passavi percete te servia qualche favore, se cu ne cunti tie te ne scurnavi,   sapia te tira iddru le parole.

Invece, quannu moi faci ddre scale, e trasi intra la stanza cchiù importante senti ca la malincunia te assale percé ddra scrivania staie vacante.

Ma cinca s’ha sittare a ddra poltrona A susu u Municipio a Casaranu, ulia ieu cu ne ticu te persona "Faciti cu nu n’eggia mortu invanu.

Faciti in modu ca l’insegnamentu Ca a tutti st’anni n’ha saputu tare, nu vegna menu mai pé ‘nu momentu. Cusi Lu nome sou se po’ onorare!"

Quiddru ca nui ne pote consolare, è u fattu ca sicuru    u Nnipotente, an Paratisu l’ha fattu ssittare cu cura iddru quannu nu se sente.

E na lassati tutti capisutta cu riflettimu e cu ne tisperamu percè susu sta terra cusì brutta n’ommu te quiddri nu nu meritamu.

Mo lu ricordu sou ieu me Lu portu scolpitu intra te mie, susu Lu core nu mboju me convingu ca iddru è mortu perciò nu dicu addiu ma...

CIAU TOTTORE!!!

Rocco Fracasso

Il saluto dei volontari della Comunità Emmanuel a William